كنا نقرأ روائعه ونسمعها من عمالقة الفن السوداني…. وكنا نسعد كثيرا حينما ينشر نص جديد لهاشم صديق في جريدة السودان الحديث….حينما كان ( الكلام ممنوع)..!
(والعيال كبرت) .. واتلاحقت الكتوف… جسدا وليس عقلا… فكان لي شرف العمل معه بصحيفة الخرطوم…..كانت ( مخيفه ونظيفه) … فيها د. الباقر وفضل الله محمد وهاشم ودامنه….( بالله ده ما انقلاب عديل؟)..
هاشم كان يطلق صواريخ عابره للقارات من أقصي امدرمان لاقصي الخرطوم شارع سان جيمس…. تمر بشارع النيل عبر القصر الجمهوري( عدل ) لتستقر بمباني جريدة الخرطوم…!
كان هاشم ( لطيف) لو كان حال البلد مفرح….وشفيف لما يكتب …. ونضيف لما (يعشق) ….(ومخيف) لما يزعل!
صاحب طرفه عفويه تاتيك من بديهة حاضره…. التقي الشيخ عبدالحي يوسف بخذينة الاذاعه قبيل عيد الفطر بيومين … صرف هاشم حقوق بث اغنياته (٤٥ جنيها وقتها)… وصرف عبدالحي(٨٠٠ جنيه؟)…قال ليهو :-
( ياخ انا صرفت ٤٥ ج في شعر الفتو وكتبتو…. انت تصرف ٨٠٠ جنيه ليه انت مؤلف القران؟) .. ضحك الحاضرون… بمافيهم عبدالحي يوسف… وسلمه مائة جنيه وقال ليهو امشي ( تم ضحيتك ياهاشم)!!!
هكذا عرف … وهكذا احبه الناس جميعا… لظرفه وتواضعه….!!
هاشم المناضل الذي الف المعتقلات… وطني غيور…ومصادم جسور….مبدع وفنان… ملأ الدنيا ابداعا ….وضجيجا..
نقل الي ذات امسيه بحراويه( جميله) الأخ حسن ابن الفنان صلاح ابن الباديه رحمه الله…إن الاستاذ هاشم صديق أوقف كل تسجيلات الفنانين التي كتب كلماتها من كبار الفنانين بمافبهم ودالباديه… وعرفت منهم ان اكثر أغنيات هاشم التي يحبها صلاح هي اغنية (ياجنا)…وكانت الألحان لصلاح نفسه…وبما ان هاشم جميل وصديق ووريف….كتبت مدحة ( من هنا) وفصلتها علي اللحن وسجلها صلاح…! وعادت المياه بين المبدعين لمجاريها… وقابلت المرهف هاشم بالمصنفات وقال لي( انا مافي الاغنيه ولا في اللحن…انا المحيرنى انت مالك ومال المديح يازول؟).. وكان هذا كل ( ردالفعل) الذي جاء من عملاق تعديت علي حقوقه !!(عمدا)..
هاشم نعي ( القرنتيه) فثارت معه كل بحار الدنيا… هاشم كتب ( جان والكريسماس) فجعل المحبون يرتادون الكنائس ويحبون الصلوات لحبه….هاشم كتب ( حاجه فيك)… ولما سألتو من الحاجه دي شنو؟؟
ابتسم وقال لي ( انا لو عارفا ماكنت كتبت القصبده) رد العلماء المبدعون الواثقون المتمكنون!
هاشم رحل…وترك النقد والمسرح والشعر والجمال والروعه والمعتقلات..!!!
(انا لله وانا اليه راجعون ) صدق الله العظيم!!
€€ كان كريسماس في عوالم يمه لي عيونك جديده…
النبيذ في عروقي بق ولهلبت روحي الموسيقي….
وجان بترقص.. ولما ترقص جان بتغرق مره زي لهبا مجنح ومره زي أهل الطريقه!!!
سكرت يمه وتهت في الافق المريح…
دقت أجراس الكنائس وغنا للدنيا المسيح….!!!!
